[天后大坑] 肉骨皇 ‧ 星馬風味「肉骨皇」| 咖央吐司超驚喜


這天天氣寒冷,仲落住毛毛雨,放工後同友人來到大坑一趟,每次黎到浣紗街一帶,眼睛只集中在拉麵來、民聲冰室、龍鳳冰室等一帶。其實再行入少少仲有間頗有特色,食肉骨茶和星馬菜的店子「肉骨皇」

店子用上深啡色的餐檯椅子及前方的格仔牆壁,還頗有一貫星馬餐廳的感覺。

食物的種類也不少,包括招牌肉骨茶、沙律/頭盤、小食、主菜、咖哩/喇沙和海鮮等,有好多都想試呢!

桔仔酸梅 $35
入口酸酸甜甜帶有梅的味道,雖然梅味不算重,但也頗好飲。

檳城肉骨茶 (細/大) $82/$148
講事實小妹都係第一次食肉骨茶,一直好怕藥材味道會好濃,不過聽好多朋友話好好味架,所以都想試下!

呢度既肉骨茶有分大同細,今次叫左個細既試下,兩個人每人分到約兩碗,另跟上一小碟油條放湯用。「檳城肉骨茶」熱辣辣的用爐熱著,份量都唔少,主角「肉」煮得夠腍身,入面仲有金菇和豆卜,深啡色的湯底有濃而香的藥材味,甘甘醇厚的味道,不錯。

麥皮蝦 $98
新加坂地道菜式,簡單又美味。一碟五隻麥皮蝦,用上虎蝦沾上麥皮再拿去炸,所以可以連蝦帶殼同食。
第一次食麥皮蝦的小妹覺得很特別,入口先帶來麥皮的香甜,食落去係香口的,但略嫌蝦殼炸得未夠鬆脆,咬落某些位置仍是硬身和有點吉口,仍有改善空間,不過味道是不錯的。

亞囉螄蚶 $88
據說這裡的螄蚶係泰國新鮮運來,所以可以安心品嚐嚕。
以白灼的方法來煮,還未全熟的螄蚶仍帶點血水,像小妹本身是頗怕這種血腥味的,但入口後發覺這裡的沒有預期般帶有難頂的血腥味,醮些醬汁,整個超惹味,而且螄蚶食落幼嫩,看來我會開始喜歡這食物了。

巴東牛肉 $88
一向超鍾意食印尼菜入面既巴東牛肉,以多種香料所烹調,醬汁非常濃稠,帶有陣陣椰香味,用黎撈飯一流,不過略嫌筋位有點韌。

馬拉盞炒椰菜苗 $65
椰菜苗炒得濕了點,可以再乾身些,不過以馬拉盞來炒的這道菜確實惹味,吃了不少。

咖央吐司伴雪糕 $55
當初還在想這吐司會否又係好睇唔好味既甜品?但當店員話球雪糕係香芋味時就決定要試下。

吐司上桌時size唔係好大個,但足夠二人分享。正立方體的吐司烘至金黃色,內裡搽了牛油和咖央醬。

鬆軟微熱的吐司咬落有陣陣牛油香外,也有咖央的甜味,就係覺得好好味,完全是小妹杯茶,配埋有天然芋頭香的香芋雪糕,整個更加滿足,很夾也很有驚喜,一定會再黎食。

肉骨皇
地址: 大坑浣紗街45號浣紗花園地下1號舖
電話: 2972 2266
營業時間: 星期一至日: 12:00-15:00;18:00-23:00
================================

(喜歡的,請按讚支持,是給我很大的鼓勵啊  


相連文章

一般留言

發佈留言

發佈留言必須填寫的電子郵件地址不會公開。 必填欄位標示為 *