[旺角] 北京老家 ‧ 北京夜,令人矚目的拔絲士多啤梨 | 還有一系列特色京菜


平時小妹一向食Cafe或西餐多,中菜多數都係一大班人先食,中菜的份量較多,多人分享先可以叫多幾款食物。不過最近又突然心血來潮想食片皮鴨,就黎到這間位於太子的「北京老家」,睇過食評半隻片皮鴨價錢唔算貴,而且仲有頗多不同的菜式可以慢慢揀,最注目一定係拔絲系列,拎黎影相一流啊!


餐廳係屬於樓上鋪,一打開電梯門,古色古香的環境就在眼前。木桌木椅木屏風,還有不少帶中國風味的裝飾,真的滿有特色。

就連每張檯入面都放置了一盤金魚,一路食飯時仲可以見到佢地游黎游去,舍意非常,這感覺真好呢!

餐廳所用的茶壺茶杯都印上了自家店名和圖案,裡頭裝的係麥茶,飲落挺香的。

餐牌上的款式選擇多,包括涼菜、北京填鴨、豬/牛/雞/羊菜色、海鮮、素菜、麵/飯/餃/餅、湯、火鍋和甜品。

蛋皮尖椒豆腐 $72
本以為會係平時食開半件皮蛋加豆腐個種,原來呢度係將豆腐切成一粒粒細小的方形再加上少許皮蛋、紅椒和青椒撈埋一齊。本身喜歡食皮蛋既小妹仲概嘆得咁少皮蛋唔夠喉喎,點知食落原來又好惹味喎,送飯一流。

蟹粉小籠包 (6個) $108
小籠包皮薄餡多,少不了的一咬爆汁,帶有蟹粉的香氣,但略嫌蟹粉味不重。

北京填鴨 (半隻 $198,一隻$358),香脆鴨皮連京蔥、青瓜條和薄餅
半份既片皮鴨份量都不少,兩個人夠食有餘。在薄餅皮上搽上一些京醬,再放上些京蔥和青瓜條,最後才放上片皮鴨包起。

咬落那片皮鴨皮相當脆身,加埋些脂肪位一同咀嚼夠晒香之餘又相當邪惡,好彩有些青瓜條平衡了一下油膩感,就是凍左咬落都係脆身,不錯。

京燒羊肉 $108
原來京燒是炸的意見,每件羊肉都炸得頗酥香,食落帶點羊羶味,整體黎講係幾香口,不過食多幾件會覺膩。

拔絲士多啤梨 $88
不愛食士多啤梨的話,仲有蘋果、地瓜、香蕉和山葯等選擇。小妹當然係首選士多啤梨,等左一陣這道拔絲終於上檯了,紅噹噹的士多啤梨上,還拉出了一絲絲亮晶晶的金黃色糖花,賣相還滿嘩然的,更惹來不少人的注目呢。

士多啤梨還滿大粒的,食完還頗多汁香甜,加埋面層的糖霜,咬落去帶微脆,甜味更見突出,好食。
北京老家
地址: 旺角西洋菜南街218-220號生發大廈3樓
(港鐵太子站 B2 出口, 步行約3分鐘)
電話: 2970 0500
營業時間: 星期一至日: 11:00-15:00; 17:30-23:00

================================
(喜歡的,請按讚支持,是給我很大的鼓勵啊  


   

上 / 下一篇文章

一般留言

發表迴響

你的電子郵件位址並不會被公開。 必要欄位標記為 *