[旺角] 青花 ‧ 青花綠州,品嚐東南亞新派菜,甜品爆谷焦糖花生葩菲有驚喜!

在旺角The Forest新商場內,開左間新既東南亞餐廳,據說係藝術甜品店ATUM的另一新餐廳。剛好睇到IGer介紹佢地既食物同環境,一大片綠色佈置,即刻同男人講話要去試下!

 

原文網址: http://connie-hk.com/champak-restaurant

 

去到餐廳門口已見到一大片綠色植物牆,呢個位置真係影相一流!而且餐廳環境頗闊落,周圍仲佈置左好多綠色植物,充滿熱帶悠閒氣息。

樓底高感覺也較為舒適,連枱櫈都滿有質感!

餐牌得一頁,有齊沙律、小食、飯/麵、主菜、全日早餐、甜品和飲品等,價錢屬中價位(需加一服務費)。部份菜式走新派路線,最吸引小妹莫過於係小食同甜品類,可惜當晚想試既「牛油果辣青檸檬薯花」因為材料唔靚,所以暫停供應。

泰國奶茶奶蓋、印度香料奶茶奶蓋 各$42
飲慣醇茶味奶蓋,呢度有比較特別既選擇,同男人各點了一杯,講真價錢都唔平,仲要再加一。兩杯面頭都有層厚厚既奶蓋,飲落質感濃稠,陣陣既芝士味頗為突出,不過兩杯既奶茶味可以再濃一點,整體驚艷度還好。

梅子椰糖西瓜沙律 $62
平時唔鍾意食沙律,但見到西瓜沙律又忍唔住試。一粒粒西瓜波,可以配上旁邊的梅子粉或椰糖食,配梅子粉食落酸酸甜甜之餘,令到西瓜更香甜。

蕉葉炸雞杯配柚子梨醬 $64
賣相好似一個甜筒杯,裝住份量不少既炸雞,炸雞肉質頗嫩滑,可惜外皮唔夠脆,蘸上柚子梨醬,味道酸酸甜甜幾開胃。

冬蔭公 (小)$82
飲落偏酸,唔會好辣,雖然成日飲到想咳想咳,但又接受到,小妹覺得非常醒胃!入面有約四隻去殼大蝦,蝦肉爽口,幾好飲,只係個湯無爐熱住上有點可惜。

鮮蝦羅望子炒金邊粉 $118
男人超愛食金邊粉就來一份吧,呢份金邊粉驟眼望落隻碟就大,但份量較細。另有配腰果、花生碎同四隻爽口大蝦。拌勻黎食,金邊粉質感還可以,影完相夾起都唔會成撮起,可惜味道太淡,只有微微酸味,好失望啊。

爆谷焦糖花生葩菲 $58
身為花生控,一見到「花生」呢組字眼已經鎖定必叫!一碟上來賣相又幾得啵,中間係花生葩菲,旁邊放左一堆爆谷仲加左焦糖醬。主角花生葩菲質感好似岩岩係雪櫃拎出黎既雪糕,比較厚實,食落尚算幼滑,而且花生味後勁凌厲,好岩我口味,爆谷都淪為配角了。

泰國奶茶奶凍 $46
郁一郁個碗會見到奶凍震騰騰彈彈下,食落唔會覺得落左好多魚膠粉而有既效果。奶凍質感軟綿綿好幼滑,奶茶味濃得黎唔過甜。

整體黎講甜品的味道和價錢都較性價比高,鹹食方面還可以,但仍有進步空間。另外店員服務態度不錯,會主動加水、收碟和換碟,我們坐了一陣才說要換位置店員的態度也很客氣。

 

 

 

青花 | Champak Restaurant by ATUM

FACEBOOKIG
地址: 旺角奶路臣街17號The Forest 1樓107-108號舖
電話: 34682558
營業時間: 星期一至日 12:00-22:30
※本文以用餐當日的環境、服務和食物質素為準,口味亦因人而異,文章只作參考之用。

 

上 / 下一篇文章

一般留言

發表迴響

你的電子郵件位址並不會被公開。 必要欄位標記為 *