[長洲] 年初三赤口遊長洲 | 密密食,特大魚蛋、煎釀三寶、甘永泰魚蛋、芒果糯米慈 | 海鮮菜館


大年初三赤口,決定與S先生入長洲走一轉,話時話真係未無試過係農曆新年期間去長洲,據說入面好多店都會照常營業,仲有唔同既小販檔口,聽到都覺得好熱鬧呀!

去到中環(五號碼頭),坐12點普通船 $19.4,大約一個鐘就到啦,好彩去程浪唔大,不過回程就….(汗)。仲見到好多人帶埋狗仔入長洲,好熱鬧。
船期表請按此
落船好彩既係人流比想像中少呀,一路行都唔覺迫! 而且天氣暗暗地唔會好熱,岩岩好。
跟住就周圍行左陣,除左一般舊有既商店,路邊都有頗多賣唔同野既檔口,玩具、護膚品、衫、自家手作袋仔、同羊年產品等。
行完一輪就開始我們既覓食之旅啦。第一轉就係食左一落船就對住個個檔口,我地幫襯左炸雪糕 $12/粒,同法式炸香蕉 $18
[炸雪糕 $12/粒 (有香芋/芒果/朱古力/雲呢拿味)]

[法式炸香蕉 $18]
價錢一D都唔平,而且兩樣既味道都係普通,炸雪糕同炸香蕉都只係多左層炸皮係外面,炸香蕉就有埋朱古力醬比你點,外型仲好似狗X。(X請自行聯想吧)

再來就係煎釀三寶檔,超多人幫襯,而且款式好多。煎釀三寶$5/三件,一串串個D就約十蚊串。
[台灣腸$10/串]

[五花茶$9/杯、$20/樽]
食完熱氣野諗住買返杯五花茶飲下,一杯$9,老闆就話買一樽$20等於三杯,所以就買樽裝,唔過甜又幾好飲啵!
見到有檔口賣壽司,傳來陣陣醋香味,不過怕太飽無食到。
跟住經過一間有賣手抓餅、芝士撈烏冬、芝士煙肉小丸子既店,望望下咁熟面口既? 原來就係葵涌廣場二樓係正即包手卷店隔離個間小食店都黎左開檔,老闆話黎擺幾日,所以就幫襯左個芝士煙肉小丸子 $22。
[芝士煙肉小丸子 $22/6粒,每盒三粒]
由於係即製,所以要等5-10分鐘到。咬落熱辣辣,咬開入面有半溶既車打芝士,芝迷必愛,不過感覺煙肉可以再多少少,整體黎講係好味既。
之後去對面檔口叫左個即拉腸粉同即煎蘿蔔糕,要自己搵位坐。
[牛肉即拉腸粉 $20]
牛肉即拉腸粉,不過腸粉太過腍身,一夾就散,純粹貪佢即拉,唔食無損失。
再黎梗係唔少得長洲出名既特大魚蛋,係落船位行上少少有間有多款唔同醬汁揀,好多人排隊買。
[長洲特大魚蛋 $12/2粒]
我地要左沙嗲同燒汁味,大大粒既魚蛋食落頗彈牙,係幾好味既!
之後又排超想食既甘永泰魚蛋,上一次黎見到排晒長龍都無食到,當然今次條隊都唔係短,都排左成15分鐘以上,真係好多人幫襯,而且選擇都幾多。
有D款仲有得兩溝,鍾意仲可以外賣返去自己整黎食。
[魚肉釀豆卜 $15 (最左個串)]
呢三串野盛惠$5x,真係幾貴下! 不過小妹都係鍾情最左邊既豆卜,脆卜卜又香口,唯一係唔夠熱。
呢度除左出名可以自行加味粉既薯片塔外,仲愈黎愈多新野推出,連窩夫塔都有,不過望見都夠晒。
[冰果胡蘆 $18]
有西瓜、菠蘿、提子、蜜瓜同哈蜜瓜等,都雪到超硬,基本上都唔係好食到d水果味,夏天食應該會好d。
仲有呢檔有賣雞屎藤、茶果、糕點同豆腐花,都好多人幫襯。食左個雞屎藤味道麻麻,但係個荔枝糕味道又幾清新喎。
呢個檔口除左有好多可愛既卡通格仔餅賣,新年期間仲有賣芝士焗生蠔、帶子同龍蝦,每款$35,雖然定價唔平,不過都好多人買,真係睇見都流晒口水。
[芝士焗生蠔 $35]
一隻份量好大咁,用左好多芝士同煙肉一齊焗,不過生蠔唔係一隻過,入面係好多細細隻蠔仔,抵唔抵食就見人見智。
[芒果糯米慈 $10/粒]
長洲名產既即包芒果糯米慈,其實而家好多店都有賣,見到芒果肉大大塊,諗都唔諗即刻要食佢,糯米皮好薄,不過食落未算好甜個隻,不過甜中帶微酸,其實都幾好味。

食到咁上下,又要消化下,去左沙灘坐左陣,吹住海風聽住海浪聲特別舒服。


再起行去張保仔洞


不過排到最尾準備落洞個時,我竟然驚得滯決定走回頭路! (太白痴了..)


不過個景確係幾靚

入夜後又走返落去食海鮮嚕,人多到…….本身有間心水,但因為人太多即情要截龍,太誇張了。所以就搵左間叫「潮發海鮮菜館」,等左15分鐘到,年初三食要加二添,不過想食無解啦! 
(最後返到屋企先知原來呢間店係好鬼多喊面,不過小妹又覺得未至於咁差..)


兩個人叫左五餸,$31x,,平均每個餸$6x,新年要再加20%。


蒜香銀絲蒸扇貝


蒜蓉蒸開邊蝦
其實一碟大約有5隻蝦到,唔太抵食。


椒鹽鮮魷


避風塘炒蜆
呢個炒蜆真係唔多掂,所謂「避風塘」只係上面灑左少少避風塘粉,而且蜆有沙,唔得。


豉椒炒蟶子

================================
(喜歡的,請按讚支持,是給我很大的鼓勵啊  

   

上 / 下一篇文章

一般留言

發表迴響

你的電子郵件位址並不會被公開。 必要欄位標記為 *