[荃灣] 良辰吉時 ‧ 台灣藝人開設既「良辰」,黑糖奶味道比想像中好,唯價錢太進取了!

台式飲品過江龍來勢洶洶,開完一間又一間,除左老虎堂外;由台灣藝人「納豆」所開設既「良辰吉時」,都係香港連開兩間分店!(荃灣及元朗)仲記得佢地個花紋紙杯真係影相一流。

 

原文網址: http://connie-hk.com/good-day-good-time

 

仲記得荃灣店新開張又排到癲左咁滯,大熱天時,願意一杯飲品等成個鐘以上既人一定唔會係小妹。事隔唔使一個月長龍已消散,小妹當日平日六點去到,只有約十個人排隊,但足足等左成15-20分鐘先到我落單,裡面人手充足(成7-8個店員),條隊卻郁得好慢,令我一度懷疑長龍既原因只係因為收錢收得慢!sick

餐牌上飲品款式選擇多,不過睇過唔少評論,奶茶似奶水,珍珠又無味,所以男人想叫多杯有味珍珠黎飲都被我否決左!最終都係要左杯餐牌上無,但廣告牌上有既「啵爆黑糖厚鮮奶」,杯黑糖奶價錢仲貴過老虎堂,到底值唔值呢?

啵爆黑糖厚鮮奶 $36
標旁用100%日本明治鮮奶,無得調冰或糖,拎上手個黑糖底好熱下。唔明有好多人都話點解黑糖珍珠係熱既,連埋珍珠新鮮煮出黎梗係熱啦,去台灣飲都係熱架(用普通糖漿圍邊同煮定既珍珠咪唔熱囉!)

上面仲有層厚奶霜同灑上脆脆黑糖,奶霜搭配下飲落奶味比較醇厚(第一二啖)。黑糖望落好多咁,飲落唔會話甜到癲左(當然要拌勻先飲啦),反而愈飲愈唔夠味。珍珠我倆都覺得唔會太腍都幾煙韌,但唔算入味。

整體不過不失,但唔會覺得係難飲!而且成杯有三份一係奶蓋,所以飲到既唔多,比較細杯,價錢亦偏貴,飲返TeaDays好過,一試無妨吧!

 

 

良辰吉時
FACEBOOK
地址: 荃灣荃興徑2-8號昌泰大廈地下4號舖 (港鐵荃灣站 D 出口, 步行約5分鐘)
營業時間: 星期一至日 11:00 – 23:00
※本文以用餐當日的環境、服務和食物質素為準,口味亦因人而異,文章只作參考之用。

上 / 下一篇文章

一般留言

發表迴響

你的電子郵件位址並不會被公開。 必要欄位標記為 *