[深水埗] 公和荳品廠 ‧ 人流不斷的深水埗地標,傳承百年的手工豆製品

咁岩要去深水埗電腦城,飯前小食就去試下有百多年歷史既「公和」,據說「公和」出名自家豆製產品,用上加拿大非基因改造豆,確保質素。

 

img_3587

店子的外觀充滿著老店的感覺,六點幾人流真係好多,阿姐頻頻煎豆腐賣豆腐,店子都有不少豆類製品賣,好似腐皮、嚮鈴、枝竹,當然不少得豆腐豆漿豆卜等,因為人太多只簡略拍一下門面好了。本身想堂座又滿座,好彩原來仲有得上樓坐!

上樓的地方放了三四張檯,會有店員上黎同客人落單,客人通常都係快快食完就離座。

餐牌上的豆製品有豆漿、豆腐花、煎釀豆卜、黃金魚腐和煎釀豆腐 (三款煎釀都想試的可以來一客三拼都係$14)

另外仲有腸粉、燒賣魚蛋、炒麵炒米,牛肉球等,醬汁黃糖都放晒係檯自己落的。

一場黎到梗係要掃餐牌,豆製產品通通都來一客吧!

豆腐花 $8 (熱/凍)
食豆腐花感覺熱食豆味會更重,不過大熱天時都係黎返碗凍既降降溫。黃糖自己落,通常我落少少就夠,怕佢蓋晒豆味。食落真係夠滑溜,豆味頗濃??好快食晒成碗

豆漿 $5 (熱/凍)
豆漿入口順滑無渣,豆味頗濃,就係甜度稍高。

煎釀豆卜 $10/5件
豆腐卜炸得夠乾身不油,咬落酥香可口,很脆身,後來仲加多一碟,一碟真係唔夠食!

煎釀豆腐 $10/4件
豆腐上釀了點鯪魚肉,魚肉食到彈牙口感,而且豆腐唔會一夾就散,豆味濃郁,蘸些豉油用來送飯都好好食!

黃金魚腐 $10/4件
圓滾滾煎至金黃色的魚腐,內裡的魚腐夠滑,建議可蘸些泰式辣醬食,會有食緊泰菜炸物的感覺。

叫了這樣多款兩個人食,賣單$58就成為我們的晚餐,簡單好食又滿足!去到深水埗真係要試下。

 
公和荳品廠 Kung Wo Dou Bun Chong
地址: 深水埗北河街118號地下
(港鐵深水埗站 B2 出口, 步行約1分鐘)
電話: 2386 6871
營業時間: 星期一至日: 07:00-21:00

上 / 下一篇文章

一般留言

發表迴響

你的電子郵件位址並不會被公開。 必要欄位標記為 *