[荃灣] LAB MADE 分子雪糕專門店 ‧ 除左分子雪糕外,仲有食得睇得又玩得既「分子火山蛋糕」 (已結業)


一直知道LAB MADE出名分子雪糕,卻遲遲未有試過,近來知道佢地係荃灣開左間LAB MADE Cafe,對於小妹黎講真係超級就腳,而且除左雪糕外,仲有供應埋蛋糕同飲品呢,聽上去都很吸引。


店子以型格的黑底白字裝潢設計,配埋LCD叫號碼既顯示屏同大電視,感覺上好潮呢。店內坐位唔多,放左幾組黑色桌椅,人多既時候相信等位係必要的。

客人仲可以直接睇到店員製作分子雪糕的過程。
講到分子雪糕,最重要既元素必定係「液態氮」,據說處於-196度既極低溫,當此元素加入材料同雪糕漿拌勻後就會好快變凍,好快就可以製成一杯分子料理雪糕。而且無加入人工穩定劑,味道全天然,所以會比較快溶。

今日供應的四款包括: 奶醬脆多、海鹽焦糖、紫米露及芒果菠蘿乳酪。最尾小妹揀左頭兩款,其實都好想試埋佢地既乳酪,但又怕太飽。


而且呢間LAB MADE仲埋蛋糕供應添,賣相都幾靚。

由於分子雪糕係即整,所以都要稍等一會。

奶醬脆多雪糕 $44
賣相較為平實,入口果然有陣陣的花生香呢,而且每啖都食到脆脆,增加了口感外味道都唔錯,真係好似真實既奶醬多。

海鹽焦糖雪糕 $44
呢款海鹽雪糕既顏色同奶醬多都好似,但就多左塊朱古力薯片做裝飾。相對於奶醬多,呢款就唔太食到焦糖味,海鹽既鹹味比較突出,整體較遜色。

紅莓芝士蛋糕 $38
一看到蛋糕櫃內有這款鮮艷套目的紅莓蛋糕,小妹當然要了它!
紅噹噹的紅莓整齊的排列好,真的很吸引。紅莓食落清甜,反而芝士蛋糕的味道無想像中濃郁,質感唔會好實個種,所以食落較輕盈。小妹反而喜愛這味道,起碼唔會食到好飽滯;配埋底下既麥餅底,小妹覺得頗好味呢。

分子火山蛋糕 $88
最近火紅的分子火山,睇得食得又玩得。外型整到好似火山咁,中間有埋火山口,火山口邊有些白色粉末,店員解釋過係乾冰黎,隨即亦會附上一小杯據說係「分子汁 (蕃紅花蜜糖)」比客人倒上去。

之後就會好似火山爆發般,可以營造出煙霧瀰漫既效果,仲會見到有泡不停在”卜卜卜”,視覺效果很理想,覺得好特別!
朱古力慕絲食落幼滑味道香濃,但密度高,所以感覺上好飽肚,建議兩/三人一齊享用會比較好。

Lab Made特濃Valrhona熱朱古力 $36
貼心的店員先問小妹是否要少甜? 有得少甜梗係好啦。
用上法國品牌的Valrhona所沖的熱朱古力,一入口就感覺到面層的泡泡比較厚,不夠滑,幸好底下的朱古力尚算順滑;而朱古力味不算是很濃那種,係慢慢滲出陣陣朱古力香,帶點微苦,不差。
Lab Made 分子雪糕專門店
地址: 荃灣眾安街68號荃灣城市中心一期2樓
(港鐵荃灣站 B1 出口, 步行約5分鐘)
電話: 2670 0071

================================
(喜歡的,請按讚支持,是給我很大的鼓勵啊  

相連文章

一般留言

發佈留言

發佈留言必須填寫的電子郵件地址不會公開。 必填欄位標示為 *