[太古] L’Éclair de Génie ‧ 閃電泡芙之魔力

如果問你「點解會有閃電泡芙之稱?」你會知道嗎?…據說係因為太好食,法國人可以閃電咁一條接一條迅速食晒,就有左閃電泡芙之稱,聽落都幾盞鬼!專門店至今在全球(日本、米蘭、俄羅斯)多達20間,不能睇少其受歡迎的程度。

原文網址: http://connie-hk.com/leclair-de-genie

 

對於風摩一時既閃電泡芙,小妹只覺得佢既外觀很美,每次經過專門店都只係望兩望滿足眼簾就閃人,深怕佢會係好甜好甜得個靚字。不過男人見我成日得個望字,就話如果唔岩食最多佢包底,終於有得試下喇!

是晚去開太古城中心可以順便食埋,太古城分店最好既係有得坐,可以慢慢食慢慢影,岩晒小妹!(始終怕拎到返歸會走晒樣)

店內有幾張枱椅,裝潢同裝飾得都幾靚,另外仲有設置飲品櫃,售賣冷泡咖啡同果汁等,仲有自家品牌既朱古力,連招牌閃電泡芙都有得客製化,用黎慶祝紀念日或節日都得,感覺很潮!

閃電泡芙的口味十分多,已研製出超過二百多款,N°數字係代表泡歡口味的創作次序。香港分店亦會每個月推出不同味道,務求滿足到客人的需要,又可以嚐試不同的味道,保持到新鮮感。

閃電泡芙除左焦糖同果仁口味外,仲有推出清新果香味系列,切口不同客人的口味,就好似小妹,偏愛果味重的泡芙,感覺會無咁膩,所以有三款都揀左果味的。

N°1 海鹽焦糖 $38
此為創辦人首款推出既口味,呢款海鹽焦糖如果鍾意食太妃糖既話一定好鍾意!裡面填了滿滿既海鹽焦糖忌廉,焦糖味好濃郁香甜,個種香甜係連牙齒都感覺到,甜度確實稍高,但又會忍唔住想繼續食,真係一款令人又愛又恨既味,可以同朋友一人一半就岩岩好。

N°122 士多啤梨泡芙 $48
咬落鬆軟既泡芙上放滿士多啤梨製成的果茸醬、士多啤梨片和忌廉花,仲有少許粒粒曲奇碎在內;咬落口感豐富,有酸酸甜甜的士多啤梨提味,還不錯。

N°258 雲呢拿紅桑子 $45
裡面填滿雲呢拿紅桑子忌廉,忌廉細滑,食落超重紅桑子味,味道仲要好似我以前勁愛既Chez Shibata其中一款皇牌蛋糕😍😍😍 可以食得返呢個味道真係好驚喜,小妹真係偏愛呢款味道🍓😊

N°135 菠蘿青檸泡芙 $45
另一款同樣幾鍾意既果味系列,味道清新香甜既菠蘿青檸忌廉,後續會帶有陣陣菠蘿的果甜味,配上面頭的熱情果脆脆,好適合炎熱既夏天品嚐,食完都唔覺膩。

法式貝殼蛋糕 每款$15
除了閃電泡芙外,仲帶來了法國傳統小吃Madeleine。
有抹茶、士多啤梨、檸檬和黑芝麻,貝殼蛋糕面層裹上白朱古力同黑朱古力,多左重滋味,小妹獨愛檸檬。

Cold Brew $30
本身小妹唔太好咖啡,男人又想試下,買左枝黎試。男人話味道方面都係偏向酸味,好唔好飲就見人見智了。

 

 

 

※本文以用餐當日的環境、服務和食物質素為準,口味亦因人而異,文章只作參考之用。
L’Éclair de Génie | FACEBOOKIG
地址: 太古太古城道18號太古城中心2樓236-237號
(港鐵太古站 E1 出口, 步行約1分鐘)
電話: 2881 6398
營業時間: 星期一至日 11:30-20:30

 

 

上 / 下一篇文章

一般留言

發表迴響

你的電子郵件位址並不會被公開。 必要欄位標記為 *