[旺角] 潮福蒸氣石鍋 ‧ 用上「草帽」作鍋蓋的蒸氣石鍋,保持原食材的原汁原味!


由韓風帶起既九層海鮮塔熱潮,每層都放住唔同既材料,包括海鮮和蔬菜等,對於海鮮控黎講,真係睇見都想食。


九層塔小妹就未試過,不過除左佢之外,近來亦有另一種新輕食法,就係蒸氣石鍋。

位於旺角既潮福蒸氣石鍋,據說原來餐廳引入左雲南傳統,以藤編織成的草帽當作鍋蓋,再利用檯下既大瓶蒸餾水產生蒸氣,清蒸海鮮、肉類和蔬菜。由於「草帽」密不透風,有很強的保溫功能,避免了倒汗水的問題,清蒸既食材都無落味精,原汁原味,保持食材的原有鮮味。

大約七點鐘去到,已經坐無虛席。餐廳環境頗似中式酒樓般,不過裝潢就較摩登小小。

最前方放置了多款海鮮讓客人選擇,真係好多款! 牆上列明每款海鮮既價錢,清清楚楚,但記住呢度有收加一服務費。

仲有個位置好似打邊爐般,放左各款調味醬,讓客人自行「混醬」

餐牌每款食材都列明需蒸的時間,所以每檯都會有個計時器。另外仲有一些熟食可以叫,像口水雞、沙薑豬水和三文魚刺身等。

小妹又忍唔住叫左個麻辣口水雞 $48,估唔到份量唔少之餘,肉質嫩滑,仲有陣陣麻辣香,好惹味!

先叫左個細的新鮮排骨粥底 $60 (大的$100)。這個粥底用上珍珠米、南瓜同排骨。,在上面再放上一個蒸盤,所有海鮮和蔬菜就在上面一同蒸,粥底便會吸收晒那些食材的精華,入口盡是鮮味。

南非龍蝦 $168/隻 (蒸5分鐘)
原隻開邊,上面放左些蒜茸一齊蒸。開邊左既龍蝦可以整條起肉,食落啖啖肉,食得好方便,肉質唔鞋口夠嫩,仲有蒜茸既香味,好食。

紐西蘭聖子皇 $46/隻 (蒸4分鐘)
可揀蒜茸或清蒸,我地揀左前者。聖子大大的一隻,其實就咁清蒸已經可以食到佢既鮮味,聖子皇咬落夠爽口,鮮味不足。

日本大元貝皇 $68/隻 (蒸6分鐘)
我地真係好鍾意蒜茸粉絲蒸,感覺寧舍惹味。大元貝肉厚多汁,連埋粉絲一啖食落好滋味,每人一隻真係唔多夠喉。

蟲草花蒸新鮮雞 $148半隻, 288一隻 (蒸9分鐘)
蒸過後既雞肉咬落同樣嫩滑多汁,無落多餘既味精,簡簡單單去蒸佢都可以好夠味。

金蒜蒸芋頭拼蕃薯 $78 (蒸6分鐘)
芋頭和蕃薯都蒸得剛剛好,唔會過腍或硬,咬落啖啖芋頭在口中,岩晒鍾意食芋頭既小妹。反而就覺得金蒜配蕃薯唔係咁夾,所以食個時都會撇開晒面頭那些蒜。

食到最後既粥底,由於已經吸盡精華,所以唔使調味,入口已經好鮮甜!
整體黎講海鮮的味道都好唔錯呢,味道夠鮮,而且選擇多,屬中價位,唔算太貴。鍾意食海鮮既應該會鍾意,完全有再來既理由。
潮福蒸氣石鍋
地址: 九龍旺角旺角道一號商業中心一樓全層
電話: 2392 3396
營業時間: 5:30pm-4am
*(晚上九時後入坐仲有全單八折!)

================================
(喜歡的,請按讚支持,是給我很大的鼓勵啊  

相連文章

一般留言

發佈留言

發佈留言必須填寫的電子郵件地址不會公開。 必填欄位標示為 *