[紅磡] 小城年代 ‧ 紅磡區內不錯的餐廳小店,特大XL水果茶和玫瑰雞翼很不錯呢


近年來香港有愈黎愈多特色小店餐廳開業,小妹就最鍾意去發掘唔同餐廳所供應既特色食物,有時就算只係個環境裝潢設計得靚,都足以吸引小妹去幫襯。


最近就知道紅磡區內開左間新餐廳「小城年代」,剛好同事去過後大力推薦,話食物質素唔錯之餘,價錢又唔貴,所以就即刻搵日放工入去食晚餐。

餐廳環境唔算難搵,如果係旺角坐紅van去就即情就係餐廳附近落。去到個時約七點鐘,人流未算好多。餐廳裝潢走新潮摩登路線,坐位闊落舒適,某個位置仲放左一架單車上去呢,令我諗起Bricklane都有同樣既設計; 侍應們都以年輕人為主,服務態度都頗好呢。

發覺而家好多餐廳既餐牌都設計成好似報章雜誌般。


部份餐牌


部份甜品選擇,小妹今次就未有試到,不過望上去好似都幾吸引。

蜂蜜檸檬蘆薈冰 $32
呢個飲品睇個名好似好普通,但係一睇到實物就覺得好有台灣既感覺。因為蜂蜜同檸檬蘆薈冰係分開上,仲用上木盤子盛著,感覺擺放上都有用心到。
要飲用既時候便將蜂蜜水倒落杯子內,味道很清甜,小妹覺得很潤又頗好飲呢,值得一試啊。

派對年代水果茶 $58 (特大XL)、$38 (XL)
由於小妹超鍾情於水果茶,所以緊係要個特大XL,而且平時出面普通size既都要四五十蚊,呢度只係五十幾,感覺好抵,點可以唔叫個特大呢?
點知一黎到真係好大杯,所用既器皿就係平時用黎飲啤酒既大杯,份量超大。內裡放左唔少生果肉,味道同樣係酸酸甜甜,滲出陣陣茶香同果香,飲落很順口,清新又解渴,頗有驚喜呢。

避風塘魷魚圈 $58
一砵上桌的份量頗足,每件都炸得很香脆熱辣辣,魷魚食落都算彈牙,整體很香口,就係避風塘既味道唔明顯。

雞翼嘉年華 $38 (6件)
一碟包括左三種味道既雞翼,玫瑰/檸檬/水牛城,每隻兩件,如果雞翼可以熱返少少就更好。

感覺最特別既係玫瑰味雞翼,平時玫瑰味用係咖啡或甜品就比較常見,估唔到配搭雞翼又幾夾,食落有濃郁既玫瑰香,甜甜地,幾好味。

水牛城雞翼就比較辣,不過就辣得頗惹味。檸檬味就較普通,味道甜甜地,有點似蜜糖雞翼,如果有得就咁散叫每隻味道既雞翼就好了。


法式東坡肉 $118
一大煲既東坡肉,用上美觀的陶瓷器皿盛著,大大加分。東坡肉既份量唔少,足夠兩人享用。東坡肉所炆煮既醬汁味道頗似甜豉油,每件都係一層脂肪一層肉,煮得夠腍身同入味,個種脂肪豐腴既口感,每食一件都感到超邪惡的。所以店方仲跟左碗味道香口既蛋香蔥炒飯,呢碟東坡肉真係佐飯一流。

黑松露烤牛扒流心飯 $68
又黑松露又牛扒,都係小妹鍾意食既,一望餐牌已經想試下佢。初時仲係度諗緊咩係流心飯,所以問一問店員,原來姐係飯同飯中間夾左層芝士,聽上去感覺幾有趣,剛好我地又係芝士迷,就要呢個喇。
上到桌原來係焗飯黎,兩旁仲放左些蘿蔔、西蘭花等蔬菜; 中間就係烤牛扒,牛扒上黑色的係黑松露醬,整個飯感覺滿豐富的。
先食牛扒,質感其實就好似平時食早餐既薄牛扒,因為淋上醬汁既關係,唔太感覺到烤過。用匙羹不到底,中間淡黃色的原來就係芝士層,但其實完全食唔出芝士味,所以有點失望。
岩岩入黎見到咁多負評都幾驚訝,因為當晚所食既食物水準都唔錯,價錢又唔貴,其實都有諗過再入黎食多次,希望下次都繼續保持到水準吧!
小城年代
地址:紅磡黃埔新天地奇妙坊G6B號舖
電話: 2790 6328
營業時間: 星期一至日: 10:00-22:00

================================
(喜歡的,請按讚支持,是給我很大的鼓勵啊  

   

上 / 下一篇文章

一般留言

發表迴響

你的電子郵件位址並不會被公開。 必要欄位標記為 *