[銅鑼灣] 二訪Seoulmate Cafe新店面:品嚐飯後甜品


是晚同老公食完一餐美味的日式丼飯後,意猶未盡又想食埋甜品,當然小妹一早連甜品店都搵埋!鎖定左剛從西營盤䢪遷不久的Seoulmate Cafe,好消息係終於唔使再行個條長命斜喇!

重溫首訪文:
[西環] Seoulmate Cafe ‧ 走上大斜路,來到悠閒寫意的韓式咖啡室 | 份量超大的韓式刨冰,特別的柚子咖啡~還有俊俏的韓藉店員(老闆?) 呢!

原文網址: http://connie-hk.com/seoulmate-cafe2

 

話說西營盤店去過兩次,感覺他們出品的食物都很用心,其飲品配搭上也有特別之處,仲記得個時有學生妹經過特登偷望店內既OPPA,確實令人印象深刻(笑),所以知道佢地搬左鋪又推出新食物便決定黎試下。


由於剛搬鋪始終未係太多人知,所以八點上到去仲有好多位。新鋪環境真係比以前大得多,舊鋪一眼望到晒,新鋪更設有十幾人包廂和梳化位等,配上簡約的韓風裝飾擺設,感覺很不一樣。


不過他們有保留到舊有既室外露天座位,環境同樣大左好多!可惜既係當日不停落雨,為有坐返室內吧。


和舊店同樣質感的餐牌,食物種類的選擇多了不少,不再局限於環境(之前廚房細),提供多了主食,像意粉、麵和小食,仲有各款甜品和飲品,狀甚吸引!而且發現佢地好多菜式都有用到近來大熱既紫薯,今次未試到主菜,都有叫杯紫薯飲品試試。
(餐牌太多放在最後)

我倆在甜品和飲品選擇上周旋左好一陣子,可愛的Oppa見我地好似有選擇困難症,都有過黎用英文推介比我地!最印象深刻莫過於餐牌上的「靚韓妹年糕多士和雪糕大戰烤棉花糖和奧利奧」、「五味加第六味係味增魚柳」,剩係睇個名都令人回心微笑!
(需加一服務費)


紫薯拿鐵 $48
用上韓國圖案的杯子盛著,拿鐵質感相當細滑,滿咀濃郁紫薯味;雖然沒有可愛的拉花,飲落卻很令人滿意!


熱綠茶拿鐵 $42
再來一杯綠茶拿鐵,這杯有可愛的拉花,但奶泡稍為厚左少少。飲落有甘甘澀澀的茶香,茶味相對濃郁,係近來飲的相對較甘澀的一杯,還不錯。


芝士拌慕絲 $78
面頭個層鋪滿水果,士多啤梨、芒果、藍莓、車厘子(果醬?),中間疑似蛋黃係水蜜桃。


就咁睇賣相好似一個營養豐富既水果盤?!咁你就錯喇,其實內有乾坤。這份甜品模仿韓式石頭飯的樣子,將飯上的配料換成水果,下層係芝士慕絲抹茶海綿蛋糕。


一下掘到底下係芝士慕絲抹茶蛋糕,食落質頗細滑,綿蛋糕軟屬輕盈不過甜,芝士味尚算明顯。細嚐下會食到微微的抹茶的幽香,味道不苦不澀,很易入口,配埋水果食更覺清新!

但係男人就話車厘子果醬既味道同慕絲唔太夾,小妹自己就覺得滿不錯,不過對於抹茶愛好者黎講可能會覺茶味不夠。

所叫的甜品和飲品感覺都不錯,相信一定會再來試其他甜品和鹹食!!

 

※本文以用餐當日的環境、服務和食物質素為準,口味亦因人而異,文章只作參考之用。
Seoulmate Cafe | FACEBOOKIG
地址: 銅鑼灣駱克道491-499號京都廣場4樓
(港鐵銅鑼灣站 C 出口)
電話: 2104 6788

 

 

部份餐牌↓

上 / 下一篇文章

一般留言

發表迴響

你的電子郵件位址並不會被公開。 必要欄位標記為 *