[銅鑼灣] Siam 28‧「泰」滋味晚餐,大推馬沙文咖哩同炒金邊粉!仲有很特別的甜品芒果煎糯米飯

銅鑼灣澳門逸園中心成座都好多餐廳,今次就去左間食泰國菜Siam28,之前係IG上見到有煎糯米飯已經一早加入waiting list,其他菜式既賣相都好吸引,讓人好期待啊!

 

原文網址: http://connie-hk.com/siam28

餐廳環境唔算大,但就裝潢得頗骨緻整潔,有別於一般食泰國菜的餐廳,比較似食西餐。我們坐靠窗的位置,晚上可以望出窗外,令人感覺放鬆。

餐牌上的菜式種類很多,較特別的有「炸女婿蛋」、「芒果煎糯米飯」、「炸通菜」、「炸特式鮮豬肉腸」也是比較少見的。「炸女婿蛋」即係炸鵪春蛋,可惜係今晚未能試到,通常呢類炸物都係又香口又邪口,好涮咀。

(餐牌太多放在文末)

Open Food $10
每一位客人餐廳都會跟一個Open Food,係一碟五款不同口味的泰式醬料,可以用黎搭配唔同既食物。好似綠色同紅色主要用黎點海鮮,青辣椒(綠色)會比較辣,紅色主要點泰式生蝦,另外仲有豬手汁同豬頸肉汁等。

燒豬頸肉 $88
向來食泰菜豬頸肉係小妹必點之菜,一碟份量都幾多。食落有燒過的味道,肉質咬落爽口,味道都唔錯。

冬蔭公 $118
冬蔭公一鍋上桌,大約分到3-4碗,湯內有4隻蝦同蘑菇等,驟眼望落賣相唔算吸引,飲落味道偏酸帶嗆喉感,惹味度只屬一般。小妹好鍾意飲冬蔭公,可惜呢鍋取悅唔到我,不過男人就話幾鍾意。

馬沙文咖哩 $118 (可跟薄餅/米綠)
馬沙文咖哩出名椰汁味重,完全岩晒小妹口味,材料有薯仔、四季豆、椰菜花同牛肉等,另跟三塊烤餅可以黎蘸咖哩汁,食落唔辣帶香甜椰汁味,真係好好食啊!

炒鮮蝦金邊粉 $118
金邊粉個賣相夠晒靚,有埋網格蛋皮包住,上面放左三隻已去殼大蝦。

金邊粉炒得岩岩好,唔會太乾或太濕,調味恰到好處,甜中帶酸,唔會偏重某一味,食落相當開胃。灑上小妹至愛既花生碎,又香又惹味。

芒果煎糯米飯 $88
而家除左長洲有煎糯米飯食外,原來呢度都有喇,黎呢度之前已鎖定左要叫返份。

一塊塊糯米飯煎到金黃色,咬落多左份微脆像飯焦的口感,中間又不失糯米飯原本煙煙韌韌的口感;配上香甜煉奶同芒果,味道唔錯又特別,不過芒果可以再甜一點。

泰式炸香蕉 $78
泰國的街頭炸香蕉亦都相當出名,所以餐廳也推出了一道甜品炸香蕉。落單後即點即炸,一碟有四件,面頭仲加左朱古力漿。炸粉皮咬落相當脆,裡頭係滿滿的香蕉肉,味道可以,但驚喜度不大,還是較愛煎糯米飯。

 

題外話:小妹就覺得Open Food收費有點奇怪,因為未必人人都會用得上呢五款醬料,而且本身唔同菜式都應該配合返相應既醬汁?要額外比錢好似有點不合理,如果Open Food係一些小食感覺會較好。

 

 

※本文以用餐當日的環境、服務和食物質素為準,口味亦因人而異,文章只作參考之用。
Siam 28 | FACEBOOKIG
地址: 銅鑼灣軒尼詩道525號澳門逸園中心28樓
(港鐵銅鑼灣站 D2 出口, 步行約1分鐘)
電話: 3421 0472
營業時間: 星期一至四 12:00-15:00、18:00-23:00
星期五、六及公眾假期 12:00-15:00、18:00-01:00
星期日(全日休息)

 

餐牌部份

 

 

上 / 下一篇文章

一般留言

發表迴響

你的電子郵件位址並不會被公開。 必要欄位標記為 *