[元朗] 鈴夏食堂 ‧ 新開的日系和風食堂,美味的牛肉烏冬,還有過癮的烏冬冬甩!

放工返家時又突然落起雨來,我倆都無帶遮,所以一路快步行去今晚揀好了的晚餐地點,開業不久的真·台客。點知去到竟然無開(哭)。諗左好耐決定去就近同樣新開張的「鈴夏食堂」,食堂就係西菁街(好包隔離),最近有不少媒體都有報導過,好驚去到又排晒隊,平日晚上六點幾,好彩去到可以直入唔使等!

 

據說食堂由人氣大熱「彩」沾麵店的老闆開出黎的另一店子,主打烏冬同咖哩。(自設工廠製作烏冬),由於「彩」拉麵得到很多的好評,所以對他們的烏冬也是滿期待的。

店子的門面少少,門外掛了一塊印上日文字的布廉,還有木系的趟門和裝潢,感覺確實很有日本風味!

打開趟門,一眼可以看得晒裡頭的情況,只有十個座位 (晚一點時開始排隊),還有透明玻璃內可以看到廚房煮食的情況,感覺衛生。

整間店的食物只有幾款,主食有咖哩飯、牛肉烏冬(可轉飯)、咖哩烏冬同飯三文治,另加4-5款小食,貴精不貴多,自然會保持到食物水準。

坐下後,店員會提供免錢的玄米茶,也有玻璃樽裝的汽水和烏龍茶等 (各$18)。本身想試的飯三文治今天是三文魚碎餡,不是小妹愛的吞拿魚沙律餡便不點了。

叫了份炸流心蛋免治 $25,上檯時好似一塊炸薯餅,切開後見到蛋黃流出,見到裡頭係一層免治肉一層流心蛋的。咬落去外皮炸得夠脆口,免治肉的味道明顯蓋過了蛋漿的蛋香,不過整體都幾好食,係一個人食晒會幾飽滯。

剛好最近成日都想食烏冬,便叫了碗牛肉烏冬$58 (加大$70),內附的溫泉蛋就另上。轉套餐加$20,包埋豚汁同酸醋海帶,由於係一份份落單即製,所以需約等15-20分鐘。

跟餐前菜的酸醋海帶酸酸的好醒胃。

豚汁=豬肉蔬菜味噌湯,味道好濃郁,料也不少,但飲落小妹覺得味道有點似花生眉豆雞腳湯,哈哈!

牛肉烏冬既賣相又綠(蔥)又紅(車厘茄),色澤鮮艷。牛肉用洋蔥炒過,帶點甜甜的味道,仲帶蔥花幫助提味;所揀的牛肉肉質又屬於較細嫩個隻,食落無咁多肥膏。

主角烏冬的質感有別一般超市所賣的急凍烏冬,沒有了個種滑溜溜的質感,麵條比平時的烏冬粗身少少,食落多左份煙韌口感;牛肉湯底沒有過多調味,似味道較清的醬油味湯底,不錯啊,小妹好快清晒成碗!

咖哩飯 $65
男人點他至愛的咖哩飯,網上見人話好好食!面頭有一大舊滑蛋,下面係白飯,仲配有南瓜、冬菇、秋葵、茄子等雜菜,男人話冬菇好好食超入味 (不過得一粒)!小妹試左少少滑蛋,蛋係炒得幾滑,咖哩就係日本個隻帶甜口味,味道正正常常,對我黎講烏冬較好食!

烏冬冬甩 (2件)$16
用烏冬製成的冬甩即叫即炸,輕輕炸過後的冬甩沒有帶脆的口感,反而係較腍身有點似麵包的口感,食得出重麵粉味,面頭加了不少糖粉,甜甜的,味道普通,就係貪得意點黎試下。試一次就夠。

 
鈴夏食堂 | FACEBOOK
地址:元朗西菁街2號興旺樓地下1E號
電話:3686 1606
營業時間:星期一至日 12:00-16:00, 18:00-21:00
(試業期暫不定休,可先致電查詢)

上 / 下一篇文章

一般留言

發表迴響

你的電子郵件位址並不會被公開。 必要欄位標記為 *