[天后大坑] The Pudding Nouveau ‧ 皮脆肉嫩的油封鴨脾拼窩夫、還有驚喜的小龍蝦牛角酥

大坑這間The Pudding,小妹話時話都幫襯過幾次,味道同價錢都頗滿意。但由於店子座位不多,仲記得開張無耐時已經一位難求,店外長期排晒長龍,現在已開業一段時間,晚上黎幫襯幾次都可以即入座。

其實呢間The Pudding同旺角嘉樂坊既Spade by Lassana係同一個老闆的,同樣食物飲品都走年輕路線,賣相靚,食物甜品多元化又唔貴。不過兩間既食物甜品都各有不同,像炒雪糕等就Spade by Lassana先有,小妹就比較鍾意大坑這間,食物較岩我心水,款式又比較多。

店內坐位唔多,顏色主調為灰色,裝潢佈置簡約舒適,餐廳內設開放式的吧檯廚房,幸好的是不帶半點油煙味。

看看餐牌,除左餐牌上既餐點外,仲有每日推介。所以我地總共叫左三個餐一齊食,同兩杯飲品。

草莓沙冰 $42
想飲拿鐵又想飲果汁,最終都係敵唔過草莓既誘惑叫左杯草莓沙冰。沙冰打得滿細滑,飲落滲出陣陣濃郁天然果香,清新解渴又好飲。

綠茶奶昔 $52
整杯綠悠悠既奶昔,上面仲放左球綠茶雪糕,飲落質感頗滑,味道唔會死甜有回甘,幾香綠茶味,比想像中好飲。

Duck Confit & Wattle $138
平時窩夫當甜品就食得多,配上鹹食就比較少。剛好近來餐廳推出左油封鴨窩夫,一份包括兩件窩夫連糖漿及一大隻油封鴨。

油封鴨脾烘至皮脆肉嫩,肉質又唔會烘到很乾,食落肉質還帶點脂肪層,愈嚼愈香。不過比起鴨肉,小妹更喜歡食那香脆惹味的外皮,那外皮同樣帶點脂肪位,咀嚼時帶點黏口,感覺很香口。配上同樣外脆內軟既窩夫,一鹹一甜既配搭,又幾好味。至於個隻太陽蛋,小妹最後都係將佢分開左黎食。

Crayfish w/ Grant Croissant $118
小龍蝦牛角酥配上黑松露醬薯條,牛角酥微熱,咬落去超酥脆,帶有牛油香,內裡塞滿了小龍蝦肉,食落鮮味啖啖肉,確實唔錯。

另配上的粗身薯條,沾上的黑松露醬,味道很濃郁呢,十分滋味,令人食唔停口。

Egg Benedict w/salmon $108
比較上面兩款,呢個班尼迪蛋既味道當然無佢地咁有驚喜,而且可能放耐左少少既關係,所以切落去已經無左流心,整體味道一般。
整體黎講,食物味道屬中上,甜品之前食過都頗唔錯,是一間絕對可一食再食既餐廳。
The Pudding Nouveau
地址: 大坑京街17A地下
(港鐵天后站 B 出口, 步行約8分鐘)
電話: 3585 7325
營業時間:
星期一及星期三至五: 15:00-23:30
星期六至日及公眾假期: 12:00-23:30
星期二休息

================================
(喜歡的,請按讚支持,是給我很大的鼓勵啊  

相連文章

一般留言

發佈留言

發佈留言必須填寫的電子郵件地址不會公開。 必填欄位標示為 *