[青衣] The Story Cafe and Bakery ‧ 藍色漢堡與海洋設計Cafe

最近係網上見到有款以海洋為主題的窩夫甜品 賣相確實十分精緻可愛,原來係出自青衣城這間新開的The Story Cafe and Bakery。這間Cafe原來同屬東海集團旗下,青衣城以大集團連鎖店居多,有多間Cafe嘆下咖啡食下輕食都唔錯。

 

原文網址: http://connie-hk.com/the-story-cafe-and-bakery

 

餐廳裝潢得幾靚,以藍色既海洋做主題,感覺悠閒!餐廳環境幾闊落。仲有蛋糕、鬆餅和牛角酥等供應。

餐牌上款式唔算多,有小食,午餐,下午茶同晚餐供應,反而甜品同飲品款式較多,價錢合理。

Like Facebook專頁或Follow IG+上載相片後,可享全單9折優惠啊!

跟餐麵包和是晚餐湯(南瓜湯),南瓜味薄弱到無咁滯,唔知仲以為飲緊茶餐廳既白湯,有待改善。

粉紅玫瑰(草莓玫瑰牛奶)$35
估唔到凍飲都可以做到漸層效果,另外仲有綠色同藍色架,睇相幾靚,不過實物隻色無睇相咁突出,但都唔差,面頭仲有幾片玫瑰花瓣做點綴。飲落草莓味雖然唔係好鮮果個隻,不過都仲可以,加埋陣陣既玫瑰味,整體都唔錯。

南極 (青檸梳打沙冰)$45
望到都透心涼既南極沙冰,飲落係偏酸既青檸梳打,好解暑啊!

黑松露薯條 $48
小妹覺得佢地跟漢堡包既粗薯條好食,但散叫既係幼薯條黎,炸得唔夠熱同脆,不過個松露醬係好食的。

車打芝士煙肉流心蛋牛肉漢堡配薯條 $118
個漢堡好大個,兩塊藍色麵包混入左天然既藍蝶花,裡面夾左紫洋蔥、菜、煙肉、芝士,流心蛋和牛肉漢堡等,仲配埋粗薯條(好食過散叫既幼薯條),好豐富。

味道都相當唔錯,對半切開仲會見到流心蛋流心。主角牛肉食落富肉汁唔乾又有肉味,仲有煎過既煙肉多左層鹹香味,仲放左酸酸咪咪既紫洋蔥平衡左膩既感覺,就係芝士味唔太夠,不過食完真係大滿足!

鴨胸伴焦糖烤甘荀配蜂蜜橙酒汁 $128
個主菜賣相又係充滿色彩,一碟有八塊煎過的鴨胸,上面淋左蜂蜜橙酒汁,食落有陣陣橙香架,又有蜂蜜既甜甜地,配鴨胸又幾好食!

另外側邊配雜菜都整得幾好食,有焦糖烤過的甘荀、薯仔條、食落帶點甘澀的椰菜仔、煙肉等一齊炒香,夠晒惹味!比配飯或意粉更吸引,食落無咁飽,女士岩岩好,男士可能會唔夠食。

粉紅芭菲 跟餐+$18 (原價$68)
跟餐加$18咁抵梗係要試下,但原來咁岩個日雪櫃有問題,無雪糕供應,店員話會轉做吉士或放多少少水果,小妹覺得可以。黎到個芭菲真係幾大杯,睇到係由忌廉、草莓片圍邊、粟米片同士多啤梨味沙冰砌成。不過味道真心一般,因為除左忌廉、粟米片同果肉有佢原本既味道外,底下既冰係完全無味,有色卻淡如水,真可惜。

 

 

 

The Story Cafe and Bakery

FACEBOOKIG
地址: 青衣青敬路33號青衣城1樓117號舖
電話: 3105 1825
營業時間: 星期一至日 08:00-23:00
※本文以用餐當日的環境、服務和食物質素為準,口味亦因人而異,文章只作參考之用。

 

 

上 / 下一篇文章

一般留言

發表迴響

你的電子郵件位址並不會被公開。 必要欄位標記為 *