[銅鑼灣] 豊洲水産海鮮丼専門店 ‧ 迷上丼飯三寶 | 刺身類都好新鮮

話說小妹太愛食鮪魚刺身了,有一段時間久唔久就會去「豊洲水産」食返個鮪魚丼飯,每次都係去好近地鐵站既油麻地分店,有次仲咁岩見到師傅們係度剖緊原條鮪魚,刀法乾淨利落,一路睇都好震撼。所以佢地既刺身質素食落都好新鮮,偶然仲會推出日本限定款式既刺身同丼飯,選擇多,價錢公道。

 

原文網址: http://connie-hk.com/toyosu-suisan

 

▲ 之前在油麻地剛好遇到師傅們在剖魚

甚少假日出街既小妹,購買新玩具必要去到銅鑼灣,順便去「豊洲水産」食午餐。由於一開門就去,人流未算多可以先影下相。對比油麻地分店,銅鑼灣店稍細,一貫的木枱木櫈,坐得都算舒適。(剛好門面正在搭棚便沒法影相了)

「豊洲水産」最出名應該係食「鮪魚」,有相關多時選擇和組合,連一些較少見既部位都有得食,包括「鮪魚骨排」、「鹽燒鮪魚餃」、「火灸鮪魚面頰刺身」、「火灸鮪魚腦天刺身」、「火灸鮪魚筋」、「和風汁煮鮪魚眼」等。

當然唔少得大拖羅、中拖羅和赤身吧!餐牌試剩係丼飯選擇都唔少,仲有得自選丼飯,全部都有晒圖文並茂,令人款款都想試!

話說去過幾次都已經食過「飛天黑鮪滿貫丼」、「飛天黑鮪三味丼」同「飛天黑鮪丼」,大部分都有鮪魚,每次既質素都令小妹滿意。今次就決定試下佢地既「大拖羅雲丹三文魚籽丼」,加$60可以轉日本海膽,一於食好少少轉埋佢!

士多啤梨芒果石榴乳酸特飲 $45

店員大力推薦呢款果汁特飲,一大樽上夠晒兩人飲,大約倒到四杯。飲落酸酸咪咪,似飲緊鮮榨果汁,好過飲梳打汽水之類,真心唔錯。

自家製松葉蟹肉蛋卷 $48

佢地既蛋卷都煎得唔錯,軟屬得來有蛋香,中心既松葉蟹肉有明顯蟹鮮味,如果有多少少蛋汁仲好。

金線鯛刺身 (五片)$118

同樣係店員推薦既金線鯛,同港人熟悉既紅衫魚同科,所以叫佢做日本紅衫魚。魚質食落較結實有彈性,食食下會有淡淡既魚味,個種味真係似食緊紅衫魚,覺得幾得意。我自己就唔算話好鍾意,男人就覺得好好食!

大拖羅雲丹三文魚籽丼 $428

原先呢個飯如果配墨西哥海膽就$368,轉日本海膽+$60,咁梗係加多$60。呢個丼飯包含左四片大拖羅、三文魚籽同海膽。

呈粉嫩色佈滿白色雪花紋既大拖羅近乎入口即溶,質感好嫩滑無筋,仲要好重魚脂香,好好食!

加左$60的日本海膽份量都唔少,金黃色既海膽仲可以一瓣瓣完整夾起,入口綿綿甘甜,鮮味充斥著整個味蕾!配埋粒粒鮮味既三文魚籽就係極品丼飯三寶!

醋米飯粒粒飽滿軟糯,陣陣醋香愈食愈開胃;刺身加埋紫菜一齊食又有另一番味道,鮮味更加突出。

另外跟丼飯既面豉湯,入面有豆腐同魚肉等,味道都唔錯。不過要襯熱飲,凍左無咁好飲。

 

 

豊洲水産海鮮丼専門店 (灣仔店) | Toyosu Suisan

FACEBOOKIG
地址: 灣仔謝斐道415-421號積福大廈地下B舖
(港鐵銅鑼灣站 C 出口, 步行約4分鐘)
電話: 28080292
營業時間:
星期一至四、日 12:00-15:00、18:00-23:00
星期五至六 12:00-15:00、18:00-00:00

※本文以用餐當日的環境、服務和食物質素為準,口味亦因人而異,文章只作參考之用。

 

 

上 / 下一篇文章

一般留言

發表迴響

你的電子郵件位址並不會被公開。 必要欄位標記為 *