東南亞風味 ▼ 香港食店‧分類 ▼ 地區‧搵食 九龍區

[佐敦] 峇里餐廳 ‧ 那些年喜愛的印尼菜

喜歡印尼菜的人不多, 始終不是大熱菜式, 沒有討好的外觀。但其實印尼菜也有很多好吃的, 滿多都是配汁撈飯一流!幸好小妹身邊有滿多喜歡印尼菜的朋友, 偶然約埋志同道合的朋友品嚐美食, 確是一大樂事!
 

還記得中學時, 常到英皇娛樂廣場後方的印尼餐廳食黃薑飯和沙嗲..個婆婆好親切好好人, 但店鋪始終捱唔住要結束營業..十分可惜! 
仲記得個時很傻的以為黃姜飯會好大陣”薑”味, 認真怕怕! 後黎才知道係兩回事, 食左一次後便瘋狂愛上! 自此之後, 便常常在葵青荃灣區一帶找尋好味的印尼餐廳..奈何數得出既真係2,3隻手指都數得晒! 仲要又貴又麻麻, 反而偶然去一些街市內的印尼雜貨店會有又平又好味的印尼菜食呢!
最近, 那些年的同班好姊妹要結婚了! 很替她開心! 這天小妹下班後, 剛好要到太子試試姊妹裙, 剛好新娘子和友人打黎話一齊食晚飯! 當然OK啦, 就由小妹決定地點, 左揀右揀後便決定到佐敦! 話說新娘子又是印尼華僑, 我又很喜歡食印尼菜!所以在OR搜尋了一會後, 便決定到「峇里餐廳 Bali Restaurant」享用晚餐!
言歸正傳,「峇里餐廳」顧名思義就是吃印尼菜的餐廳吧! 原來新娘子早前曾來光顧, 說味道還不錯, 那便安心! 7點多去到, 可能閒日關係人流不算多。在門外可看到在櫃中放了不少印尼特色蝦片、食品和特產等! 店子充滿著濃郁的懷舊氣息, 是印尼餐廳一貫的懷舊感覺。
  
每逢到印尼餐廳用餐, 總有上了年齡的婆婆和伯伯為我們提供餐牌和落單, 看來是家庭底經營, 親切非常! 餐牌亦有分2人餐4人餐, 我們還是決定散叫, 起碼每一樣都是大家喜歡的。
  
飲品點了菠蘿冰 $25, 友人的珍多冰 $25 和椰青 $28
菠蘿冰賣相滿討好, 內裡的菠蘿肉甚多, 酸甜的菠蘿汁十分醒胃。但看到友人的椰青這麼大個才比我貴$3, 頓時再想為什麼咁蠢唔叫椰青呢!? 哈
印尼沙律 (加多加多) $53
大大碟的加多加多份量十足, 芽菜、椰菜、通菜、青瓜、雞蛋和蝦片等材料, 配上惹味十足的印尼花生醬, 吃得津津有味。但有些人可能會食唔慣這印尼風味的沙律, 因為又咸又甜咁, 不是人人抵受得了。
椰汁雞飯 $48
素來白飯撈汁簡直係一大享受, 椰汁撈飯確實惹味, 只略嫌醬汁較稀, 幸好雞肉嫩滑, 挽回一點分數!
黃薑飯 細$58 大$68
細問店員大細的分別, 原來大比細的材料多三款, 身為黃薑飯擁躉的我, 加十蚊多三種喎,師奶仔心態的我梗係揀大, 不過飯的份量冇變。
黃薑飯的材料包括: 半隻雞蛋、巴東牛肉、花生魚仔、印尼薯餅、醃豆腐、雜菜、青瓜、蛋絲、肉鬆、雞肉(小雞鎚)、魚肉等。每樣少許已十分豐富, 小妹最喜歡醃豆腐, 醬汁十分惹味, 只要佢黎撈飯已胃口大開! 巴東牛肉醬汁味道濃郁, 肉質鬆化, 食少少當然不夠喉, 但奈何兩位朋友都不吃牛, 就唯有食少少止口癮吧! 主角黃薑飯, 以黃薑粉製成, 黃薑飯食落有種很香很特別的味道, 真的是印尼菜中至至至愛!
印尼粟米餅 $43
以蛋、麵粉和粟米粒製成的粟米餅, 炸至金黃色, 熱辣辣十分香口。咀嚼中有粒粒粟米很有咬口, 是一款適合大人小朋友的菜式。
沙嗲半打 (半雞半羊) $48
沙嗲醬一直都是配沙嗲的精髓!但外間很多沙嗲醬都不夠花生香..想找間合心水的難!!! 小妹就滿懷念由細食到大, 街坊沙嗲佬賣的沙嗲 (住青衣的人應該知道, 常在街邊喊: 沙嗲沙嗲!), 他的沙嗲每條都已沾上一層濃味得肯的沙嗲醬..小妹每次能吃半打!!! (太誇張了吧!?) 不得不提沙嗲佬個樣勁似賭王..哈哈! 
好!故事說完, 這裡的沙嗲燒得剛剛好, 沒有乾爭爭的毛病。羊肉串沒有羶味, 兩者仍保留著肉汁, 不錯吃, 配上印尼沙嗲醬生色不少。
這天埋單的時候, 剛好看到有班年青人在這裡慶祝生日呢! 想著想著, 在這裡慶祝生日還滿不錯嘛, 再加埋印尼千層糕作生日蛋糕更加一流!
峇里餐廳 Bali Restaurant
地址 : 佐敦南京街10號德惠行地下
電話 : 2780 7789