西歐意菜 ▼ 香港食店‧分類 ▼ 地區‧搵食 港島區

[上環] Green Orange ‧ 精緻美味的西餐,令人難忘的腐乳忌廉汁意大利麵

仲記得以前係上環返工既時候,偶然都會同同事去Green Orange食返個Set Lunch,價錢最貴都係$100內,有晒麵包/湯/主菜同飲品 (加錢仲可以有埋甜品),每次食完都好滿足咁返去開工。

闊別年幾,今晚就約左友人一齊黎食晚餐。餐廳內既裝潢格局依舊,晚上環境暗暗地還滿有浪漫氣氛。

坐下後,服務員有推介餐牌中既一些特別菜色,像「腐乳忌廉汁羊肉扁意大利麵」,聽到都覺得特別! 而且這裡的服務員都讓小妹感到很親切細心,每道菜都會問岩唔岩我地口味,偶然仲會同我地閒聊一下。

呢度既主菜/意粉都可加$88轉為套餐,是日餐湯、雜菜沙律、朱古力布朗尼及咖啡/茶; 同樣亦都可以散叫,我地就選擇左後者。

坐下後,先送上兩個麵包,分別係芝麻包同疑似提子包既麵包,客人可沾些橄欖油食。

黑松露雜菌忌廉湯 $68
質感濃厚既忌廉湯,帶有陣陣松露香,仲食到不少雜菇粒,每啖都滋味誘人。

燒帶子柚子沙律 $98
內有四隻刺身帶子,帶子微微煎過,食落頗鮮味又香,份量足; 而且所配的沙律菜加埋柚子肉,味道清甜美味,好快整碟掃光。

蟹肉酥皮盒 $108
呢個酥皮盒真係一試難忘,面層焗至金黃色且脆身很香,食落啖啖蟹肉鮮味,配埋底下的酥皮盒,真係令人食唔停口,未食完已經諗緊幾時再黎食過!

腐乳忌廉汁羊肉扁意大利麵 $188
餐廳竟然諗到用腐乳黎整醬汁配意大利麵,頗有諗頭呢。腐乳本身味道都係鹹香惹味,相信會幾好味。
一碟意粉既分量唔少,再配上三串羊肉,羊肉食落肉質唔柴,挺香,而且騷味唔重,對唔鍾意食羊既人黎講都好易入口。

醬燒美國豬仔骨 $208
唔好以為豬肋骨會無咩肉食,呢度用既美國豬仔骨每條食落都啖啖肉,肉質唔韌好易咬開,配埋燒烤醬,味道確係唔錯,女仔食既話相信食兩三條都會飽。另外仲伴上烤薯同沙律,所以呢碟豬肋骨夠晒兩三人享用。

紅桑子芝士蛋糕 $68
據店子話此蛋糕係意大利進口的,面頭粒士多啤梨都係餐廳自行加上。第一啖食落去酸酸甜甜覺得味道唔錯,雖然芝士味較淡,再食第二啖就開始覺得好甜,仲疑似咬到粒粒沙糖在口既感覺,太甜了,小妹相信呢度既自家製甜品會比呢個好味呢。

最後,再以一杯凍檸茶作結,結束這一頓美味的西餐。
Green Orange
地址: 上環永樂街50號昌盛大廈2樓
(港鐵上環站 A2 出口, 步行約1分鐘)
電話: 2541 9090
營業時間: 星期一至六: 12:00-15:00, 17:00-23:00
星期日休息

================================
(喜歡的,請按讚支持,是給我很大的鼓勵啊  

Leave a Reply