甜品/糖水/下午茶 ▼ 香港食店‧分類 ▼ 地區‧搵食 九龍區

[尖沙咀] 半熟工房 | 港版半熟芝士撻?半熟芝士蛋糕?芝士熱潮停不了!!


前排由日本登陸銅鑼灣Sogo既芝士撻人氣實在太勁喇,據聞一排就排成幾個鐘,真係無咁上下腳骨力都唔掂。小妹就梗係唔會為左呢個撻走去排咁耐,但一直又好想試下呢種芝士撻到底有咩魔力,吸引到咁多人去潮聖。剛好凱旋餅店推出左一條新支線,主打半熟芝士撻同半熟蛋糕,見人龍唔算長,一於去排下。

6點多去到尖沙咀,其實店子的位置真係好方便,就係尖沙咀B2 exit行一分鐘就到。當日去到人流唔算多,排左大約20分鐘就入到去,但不幸地當日既半熟蛋糕就賣晒,好彩我目標係芝士撻,所以都無所謂吧。
(記住購買芝士撻先要排,半熟芝士蛋糕和其他產品可直入店內!)

店子的環境尚算闊落,而且仲有售賣數款精緻的蛋糕。近門口個更有得讓客人立食,可以買完第一時間品嚐這美味的芝士撻確實不錯。不過有點疑惑,就係半熟工房的芝士撻竟然賣得比過江龍的芝士撻貴,到底值不值呢?希望唔好讓小妹失望吧。


由於數量有限,個時每人只可買六個撻(相信而家購買數量已調升返),芝士撻亦會每隔12分鐘出爐一次。負責收銀和入盒的店員都很快手,值得一讚。


半熟芝士撻 $22
見佢新鮮出爐,買完即刻現場立食食返個先。芝士撻其實比Bake大一點,不過外皮可能比半溶又熱的芝士弄至有點腍身,所以一拎感覺到有點易散,要小心點。咬落撻皮其實又幾好食,散發陣陣牛油香。裡頭的芝士真係頗流心,入口超幼滑和輕柔呢,雖然有陣陣芝士味,但未至於好濃郁,還帶點酸的味道,不過整體味道還不錯。
如果買多左食唔晒,店子話凍食有凍食既風味,雪凍之後食落會好似芝士蛋糕的口感。而喜歡熱食的小妹,就算第二日再焗返黎食,味道同樣保持到。

但其實除左半熟撻之後,小妹都好想試店子的另一款熱爆產品-半熟芝士蛋糕。剛好他經過,又買左盒返黎試下。細盒$75/5件,除返開十幾蚊件其實都幾貴,因為之前係Sogo既北海道節買同樣既產品都仲平過佢。

簡約的包裝,一盒五件,每件都有張紙條圍住件蛋糕的外圍,確保不會走樣。

蛋糕呈陀圓形,入口綿密幼滑的口感,絲絲濃郁的芝士味滲出,質感屬輕柔那種,食落不膩沒負擔,一口氣食個兩、三個不是問題,真係好食。
半熟工房
地址: 尖沙咀金馬倫道6A地下
(港鐵尖沙咀站 B2 出口, 步行約1分鐘)
電話: 6129 9293
營業時間: 星期一至日: 11:00-21:00
================================
(喜歡的,請按讚支持,是給我很大的鼓勵啊  

Leave a Reply