放題/自助餐/火鍋 ▼ 香港食店‧分類 ▼ 地區‧搵食 九龍區

[旺角] 牛気 ‧ 又一新既涮涮鍋任食放題店,質素頗不錯啊 | 牛魔王 x 棉花糖壽喜燒涮涮鍋味道很好呢


對於日式涮涮鍋放題,小妹係頗喜歡的。久唔久就會去食返一次,任飲任食90分鐘,不停叫肉食,久唔久一次其實好滿足呢。之前曾試過另一間涮涮鍋既壽喜燒湯底,甜甜既湯底配上肉類,感覺超美味的。今次黎到牛気,係因為見到佢有個棉花糖壽喜燒相當特別。


餐廳環境頗寬敞,店內大多用木櫈木桌,連牆上的裝飾都係木製的。我們這天被安排坐卡位,感覺很舒適呢。

90分鐘既任飲任食放題,價錢由$150至$378不等,共有五種價位供客人選擇,當然愈貴個款,可揀選既食物就愈多。


有幾款湯底可選擇,加多$10仲可以揀兩款湯底添。湯底包括北海道昆布湯、蕃茄龍蝦湯、博多豬骨湯、韓式辛味泡菜湯、三文魚味增湯、昆布辛口地獄湯;另外推介的壽喜燒口味,即係甜醬油湯,呢款湯底簡直係小妹食涮涮鍋既至愛,而且今期仲做緊綿花糖壽喜燒湯底推廣,聽上去相當特別,唔使諗一定係揀佢!


同其他的涮涮鍋一樣,都係自行係出面拎醬料、其他配料、甜品、飲品同雪糕等。配料除左大路款式,包括餃子類、丸類、各款蔬菜、烏冬及麵食等。另外都有些較特別既款式,連咖哩飯、牛肉炒飯都有。

醬汁同醬料都有幾款選擇,小妹最鍾意甜醬油加蒜蓉、葱粒同麻醬,正。

捲捲棉花糖製作過程

一坐低就叫左呢個湯底,店員先在煲內用豚肉脂肪一路煎把油迫出,打圈咁塗在煲內。再用一大串白色棉花糖放入煲裡,一邊攪拌,棉花糖會慢慢溶化,煮到差唔多就再將甜醬油,即壽喜燒湯底倒入煲內,等佢慢慢滾。據說以呢種方法所造就既甜味,會比落砂糖更加香甜美味,而且也很有綽頭呢。


極上澳洲和牛牛肩肉 ($378/位)
雪花紋很細緻,整碟和牛排得很美呢;入口質感細滑,食落感覺輕輕的,而且牛味濃郁,配埋壽喜燒湯底,更能帶出牛肉的鮮味,真係好好味。

嚴選澳洲和牛牛肩肉 ($318/位)
呢款係低一級既和牛牛肩肉,雪花紋當然無咁細緻,不過肉質都唔錯架,有咬口之餘肉味都唔弱。


特級美國豚腩肉
用上梅頭豬肉,肉質幼嫩,食落唔覺好肥,豚肉味都頗香。

海鮮類包括:日本帆立貝、廣島蠔、大海蝦、魷魚及紐西蘭青口。

日本帆立貝同大海蝦都相當吸引,食落感覺新鮮蝦肉爽彈,帆立貝又夠大隻,所以連續叫左幾轉呢!

一般慣常用開芝士腸既呢度改成用台灣腸; 黑色一粒粒既墨魚丸,食落墨魚味真係比白色既重。

仲有墨魚滑拎,食落頗彈牙呢。

外面仲有甜品任拎呢。每款甜品都係小小的,賣相精緻吸引,咁就唔會會食得太飽試唔到其他款。

仲有據說係食涮涮鍋必食既乳酪,呢度就有原味同綠茶味,可自行選擇用小碗或雪糕筒裝,不過還是原味比較好味呢,但甜度都幾高。
牛気
地址: 旺角彌敦道625及639號雅蘭中心1樓118號舖 
(港鐵旺角站 E1 出口, 港鐵旺角東站 B 出口)
電話: 2866 8876
營業時間: 星期一至日: 11:30-02:00

================================
(喜歡的,請按讚支持,是給我很大的鼓勵啊  

Leave a Reply