中台菜式 ▼ 香港食店‧分類 ▼ 地區‧搵食 港島區

[西環] 阿元來了 ‧ 鹽酥雞、香菇肉羹、皮蛋豆腐 |名過其實的台灣地道小吃,換來失望的味道


復活節假期第二日,下午同S先生決定入西營盤一轉,因為睇到唔少報導介紹,第二/三街愈黎愈多食店開張,餐廳都各有特色。最印象深刻必定係港鐵未開前已去過的,由韓藉老闆主理既Cafe;再來就係近來大熱主打台灣地道小食既「阿元來了」,港鐵西營盤站開通左之後,方便得多了!


原來「阿元」的店就係Seoulmate隔離,所以我們先去左食甜品,再去食他們的鹹食,一路望住出面都見到唔少人排隊,不過人流都散得很快,後來才知道原來繁忙時段用餐時間只限三十分鐘,所以想舒舒服服咁品嚐食物呢度就唔岩你喇,而且坐位小,環境都幾迫,但就裝修得頗有台灣的感覺。

排左約十分鐘到就有位,差唔多排到我地時,店員已先為我地落單,所以一坐下食物已很快黎到。
食物款式一張紙仔睇晒,魯肉飯、雞絲飯、香菇肉羹麵、甘梅地瓜、麥克雞塊(應該是麥樂雞吧!?)、皮蛋豆腐、蚵仔煎、鹽酥雞、蝦仁煎、四神湯、滷味拼盤;仲有一系列台式飲品! 
不過要注意啊,蝦仁煎/蚵仔煎/雙蛋煎/大麵粉/米粉炒/蛋蜜汁/優多柚/優多葡萄都只限在14:30-17:30供應,無緣試到蝦仁煎,頗失望呢,所以基本上可以揀既食物款式唔多。

鹽酥雞 $35
熱辣辣的炸起,食落味道唔重,就是椒鹽既味道,食落話佢香又唔係,惹味又唔覺,而且肉質偏鞋口,食完一件已經無意欲食第二件,難為他食埋我個份。

皮蛋豆腐 $30
用上精緻的器皿盛載,賣相特別,比較似甜品,但其實內裡係拌均了的皮蛋和豆腐,這食法頗新奇,但感覺就缺少了肉鬆嘛。
味道方面唔錯,每口都食到軟滑既豆腐同皮蛋香,帶有蔥花的惹味,就是稍稍偏鹹了點,而且份量都偏少,三扒兩撥就食晒。

香菇肉羹 $30
第一次食台灣肉羹,內裡有已剁成一糰(條?)的瘦肉,香菇絲和竹筍絲等,質感超杰身,好似港式碗仔翅咁,飽足感很重,但就不太食得出任何味道,只覺得味道頗鹹,稱不上美味,完全唔係小妹杯茶。

冬瓜茶 $20
冬瓜茶正常味道,飲落幾清甜,不過記得要攪均後先飲。
阿元來了
地址: 西環西營盤第三街73號地舖
電話: 3579 2460
營業時間:
星期二至日及公眾假期: 12:00-20:00
星期一休息

================================
(喜歡的,請按讚支持,是給我很大的鼓勵啊  

Leave a Reply